එළඹෙන දෙසැම්බර් මාසයේ පැවැත්වීමට නියමිත උසස් පෙළ විභාගය ලබන වසරේ පෙබරවාරි මාසය දක්වා කල් දැමුවහොත් ඒ සඳහා දිවයින පුරා පාසල් දසදහසක් වැසීමට සිදුවන බව අධ්‍යාපන අමාත්‍ය සුසිල් ප්‍රේමජයන්ත පවසයි.
වාචික පිළිතුරු අපේක්ෂාවෙන් අද (ඔක්. 3) පාර්ලිමේන්තුවේදී පාර්ලිමේන්තු මන්ත්‍රී උද්දික ප්‍රේමරත්න යොමු කළ ප්‍රශ්නයකට පිළිතුරු ලබා දෙමින් අමාත්‍යවරයා මේ බව පැවසීය.
එහිදී ප්‍රශ්නය යොමු කරමින් පාර්ලිමේන්තු මන්ත්‍රී උද්දික ප්‍රේමරත්න ප්‍රකාශ කළේ, මෙවර උසස් පෙළ විභාගය සඳහා සූදානම් වීමට තවත් මාස දෙකක කාලයක් ලබා දෙන ලෙස විභාග අපේක්ෂයින් ඉල්ලීමක් කර ඇති බව ය.
එසේ විභාගය කල් දැමීම සිදු කළහොත් අප්‍රේල් මාසයේ පැවැත්වීමට නියමිත සාමාන්‍ය පෙළ විභාගය ද පැවැත්වීමට නොහැකි වන බව ත් එම විභාගය තවත් මාස දෙකකින් කල් යනු ඇති බව ත් අධ්‍යාපන අමාත්‍යවරයා සඳහන් කළේ ය.
