ජනතා විමුක්ති පෙරමුණ කලබල කිරීමට බොහෝ පිරිස් උත්සාහ කළත් තම කණ්ඩායම කලබල නොවන බව එහි නායක අනුර කුමාර දිසානායක පැවසීය.
ඔහු එසේ ප්‍රකාශ කළේ පෙරේදා (11) පස්වරුවේ කොළඹ, විහාරමහාදේවි එළිමහන් රංග පීඨයේ පැවැති ජනතා විමුක්ති පෙරමුණේ , 33 වැනි ඉල්මහ විරු සමරුවට සහභාගි වෙමිණි. මේ අවස්ථාව සඳහා එහි නායක, නායිකාවෝ ඇතුළු සාමාජිකයෝ සහභාගි වූහ.
රටේ මහ පොළොව ලේ වලින් තෙත් වනවාට ජනතා විමුක්ති පෙරමුණ අකමැති බවද කී අනුර කුමාර දිසානායක එවැනි තත්ත්වයන් රට තුළ ඇති වීමට ජනතා විමුක්ති පෙරමුණ ඉඩ නොදෙන බවද කීය.
තමන් ඇතුළු කණ්ඩායම ඉල්මහ විරුවන් පැතූ ලොව ගොඩනැඟීමට කටයුතු කරන බවද පැවසූ ජනතා විමුක්ති පෙරමුණේ නායකයා ජනතා විමුක්ති පෙරමුණ ජයග්‍රහණයන් මෙන්ම පරාජයන් ලබා තිබෙන බවත් මෙවර අය වැය ලේඛනය ජාත්‍යන්තර මූල්‍ය අරමුලේ වට්ටෝරුවක් ලෙස හැඳින්විය හැකි බවද සඳහන් කළේය.
චංචා දූෂණයන්ට සම්බන්ධ පුද්ගලයන්ගේ දේපොළ පවරා ගැනීමට ජනතා විමුක්ති පෙරමුණ කටයුතු කරන බවද රටේ දේශපාලන පොරපිටිය නිර්මාණය කරන්නේ ජනතා විමුක්ති පෙරමුණ ප්‍රමුඛ ජාතික ජන බලවේගය බවත් ඔහු පැවසීය.
