“ජාත්‍යන්තර සංවිධානවලින් හා විදේශ රටවලින් අපි ඉල්ලා සිටින්න කැමැතියි පළාත් පාලන මැතිවරණය වහා පැවැත්වීම සඳහා ආණ්ඩුවට බල කරන ව්‍යාපාරයකට යන්න කියලා. ඒ සඳහා ජනතා ව්‍යාපාරයක් ඇති කරන්නත් අපි බලාපොරොත්තු වෙනවා” යැයි සමගි ජන බලවේගයේ ජාතික සංවිධායක පාර්ලිමේන්තු මන්ත්‍රි තිස්ස අත්තනායක පැවැසීය.
“මේ වෙනකොටත් විපක්ෂයේ සිටින දේශපාලන පක්ෂ සමඟ අපි මහජන පෙත්සමක් සඳහා සූදානම් වෙලා තිබෙනවා. එහි අස්සන් කිරීමේ මූලික වැඩ කටයුතු ආරම්භ කළා. මේ අය-වැය කාලසීමාව අවසන් වූ වහාම ඒ සඳහා පියවර ගන්න බලාපොරොත්තු වෙනවා. ඒ නිසාම වහාම පළාත් පාලන මැතිවරණය නියමිත පරිදි පවත්වන්න කියන කාරණය අපි ආණ්ඩුවට කියනවා” යැයිද විපක්ෂ නායක කාර්යාලයේ ඊයේ (14දා) පැවැති මාධ්‍ය හමුවේදී ඔහු සඳහන් කළේය.
