මහින්දානන්ද අලුත්ගමගේ මන්ත්‍රිවරයා දේශීය ආදායම් දෙපාර්තමේන්තුව සහ බදු පැහැර හැර ඇති පාර්ශ්ව සම්බන්ධයෙන් සිදුකර ඇති ප්‍රකාශ පදනම් කරගෙන අධිකරණය හමුවේ සිරදඬුවම් පැමිණවීමේ හැකියාවක් පවතින බව දේශීය ආදායම් දෙපාර්තමේන්තුවේ වෘත්තීය සමිති පෙන්වා දෙයි.
මන්ත්‍රිවරයා මෙම රහස්‍ය තොරතුරු හෙළිකිරීමේදී ‘මිලියන සහ බිලියන’’ යන සංඛ්‍යාවන්ගේ වෙනස පවා නොදැන කරුණු දක්වා ඇතැයිද වෘත්තීය සමිති පෙන්වා දෙයි. මන්ත්‍රිවරයා හෙළිකළ මෙම තොරතුරු සම්බන්ධයෙන් පරීක්ෂණයක් පවත්වන ලෙස ඉල්ලමින් දේශීය ආදායම් දෙපාර්තමේන්තු වෘත්තීය සමිති විසින් ඊයේ (17 වැනිදා) අපරාධ පරීක්ෂණ දෙපාර්තමේන්තුව වෙත පැමිණිල්ලක් ඉදිරිපත් කෙරිණි. මේ සම්බන්ධයෙන් වැඩිදුරටත් අදහස් දක්වන දේශීය ආදායම් සේවා සංගමයේ සමලේකම් එච්.ඒ.එල්. උදයසිරි මෙසේ සඳහන් කරයි.
‘‘මහින්දානන්ද අලුත්ගමගේ ප්‍රකාශ කරලා තියෙන්නේ රහස්‍යතාව ආරක්ෂා කළ යුතු සංවේදී තොරතුරු. ඒ වගේම නිල,පෞද්ගලික තොරතුරු. ඒක අධිකරණය ඉදිරියේ දඬුවම් ලබාදෙන්න තරම් වරදක්.
ඔහු දිගටම ඉදිරිපත් කරපු සංඛ්‍යාලේඛන වැරදියි. මිලියනය කියන්නේ කීයද, බිලියනය කියන්නේ කීයද කියලවත් දන්නේ නැතුව තමයි මේ ප්‍රකාශ කරලා තියෙන්නේ. දෙදාස් දහනවයේ වැරදි සංශෝධනය නොකළා නම් දෙදාස් විසිඑක වෙනකොට බිලියන එක්දහස් හාරසීයක බදු ආදායමක් ගන්න තිබුණා. මන්ත්‍රිවරයා කරලා තියෙන මේ ප්‍රකාශ මගින් දේශීය ආදායම් දෙපාර්තමේන්තුව සම්බන්ධයෙන් සමාජය තුළ වැරදි මතයක් ඇතිවෙන්න පුළුවන්. මෙහිදී බදු පරිපාලනය සම්බන්ධයෙන් වැරදි ආදර්ශයක් ලබා දීලා තියෙනවා. මේ සම්බන්ධයෙන් කඩිනමින් පරීක්ෂණයක් පවත්වලා නීතිය අනුව කටයුතු කරන්න කියලා තමයි අපි අපරාධ පරීක්ෂණ දෙපාර්තමේන්තුවෙන් ඉල්ලුවේ.’’
