විපක්ෂ නායක සජිත් ප්‍රේමදාස ත්‍රස්තවාදීන් ආරක්ෂා කිරීමට උත්සාහ කරන බව ආණ්ඩු පක්ෂ ප්‍රධාන සංවිධායක, ඇමැති ප්‍රසන්න රණතුංග පාර්ලිමේන්තුවේ දී ඊයේ (05) පැවසීය.
ත්‍රස්තවාදී පනත ආණ්ඩුව අනිසි ලෙස භාවිතා කිරීමක් ගැන විපක්ෂ නායකවරයා ප්‍රකාශ කිරීමත් සමඟ නැගී සිටි ආණ්ඩු පක්ෂයේ ප්‍රධාන සංවිධායකවරයා මේ බව සඳහන් කළේය.
විපක්ෂ නායක සජිත් ප්‍රේමදාස ගේ ප්‍රකාශයකට පිළිතුරු ලබාදීමට ආණ්ඩු පක්ෂ ප්‍රධාන සංවිධායක ප්‍රසන්න රණතුංග කටයුතු කිරීමත් සමඟ ඊයේ (05) පාර්ලිමේන්තුව විනාඩි කිහිපයකට උණුසුම් විය.
විපක්ෂ නායක සජිත් ප්‍රේමදාස – ත්‍රස්තවාදය වැළැක්වීම සඳහා රටක් තුළ ප්‍රතිපාදන තිබිය යුතුමයි. ඒ ගැන වාදයක් විවාදයක් නැහැ. දශක තුනකට වැඩි කාලයක් තුළ මේ රටේ සිදු වුණු හානිය අපි කිසිම කෙනෙකුට අමතක වෙලා නැහැ. මට මගේ පියා අහිමි වුණා. ඒ වගේම ලක්ෂ සංඛ්‍යාත ජනතාවට අම්මලා, තාත්තාලා, සහෝදර, සහෝදරියෝ, ඥාතිවරුන් අහිමි වුණා. ත්‍රස්තවාදීන් වැළැක්වීම පිළිබඳව කිසිම ගැටලුවක් නැහැ. නමුත් ගෑස්පහ හන්දියේ දී අර එදා පාර්ලිමේන්තුවේ බෝම්බ ගැහුවා වගේ බෝම්බ ගැහුවේ නැහැ. මම එකක් ඔබතුමාට කියන්නන්.
(ආණ්ඩු පක්ෂයේ ප්‍රධාන සංවිධායක ප්‍රසන්න රණතුංග යමක් කියයි.)
විපක්ෂ නායක සජිත් ප්‍රේමදාස – පොඩ්ඩක් අහගෙන ඉන්න මහත්තයෝ. පොඩ්ඩක් අහගෙන ඉන්න. අතුකෝරාල මහතාගේ ඝාතනය මම පිළිගන්නවා ත්‍රස්තවාදී ක්‍රියාවක් හැටියට. අතුකෝරාල මන්ත්‍රීවරයාගේ ඝාතනය මම දකිනවා ඒක මිනීමරු ක්‍රියාවක් හැටියට. ඒකට කටයුතු කරන්න. දැන් ඔබතුමන්ලා මොකද්ද කියන්නේ. ඔබතුමන්ලා කියන්නේ වසන්ත මුදලිගේ, අතුකෝරාල මන්ත්‍රීතුමාගේ ඝාතනයට වගකිව යුතුයි කියලද? ඉතින් මම කියන්න ඕනෑ බොහොම පැහැදිළිව ත්‍රස්තවාදියෝ, මිනීමරුවෝ ආරක්ෂා කරන්න අපි සූදානම් නැහැ.
කථානායක – මේ අනවශ්‍ය විවාදයකට අපි යන්නේ. දැන් ඔබතුමාගේ කාරණය කිව්වනේ. ඒක නිසානේ දුන්නේ ඔබතුමාට ඔය අවස්ථාව. ඔබතුමා ඕක ඉවර කරන්නේ නැහැනේ. ඔබතුමාට ඒ අවස්ථාව දුන්නේ ඔබතුමා විපක්ෂ නායකවරයා නිසා. හරි හරි One minute ගන්න.
විපක්ෂ නායක සජිත් ප්‍රේමදාස – රණතුංග මහතා ඔබතුමාගේ වේදනාව මට තේරෙනවා. පොඩ්ඩක් කතා කරන්න ඉඩ දෙන්න. මොනම අවස්ථාවකවත් ත්‍රස්තවාදය, ගෙවල් ගිනිබත් කිරීම, දේපළ හානි කිරීමට අපි එකඟ නැහැ.
ආණ්ඩු පක්ෂ ප්‍රධාන සංවිධායක ප්‍රසන්න රණතුංග – ප්‍රචණ්ඩත්වයට විරුද්ධයි කියනවා. පේරාදෙණිය විශ්වවිද්‍යාලයේ නවක වදය දීපු හැටි කියනවා. මේ ගොල්ලෝ පහුගිය කාලේ වැඩ කළේ කොහොමද? මේ ගොල්ලෝ තමයි දේශපාලන නායකත්වය දුන්නේ අරගලකරුවන්ට. ගෙවල් ගිනි තිබ්බා ගෙවල් හයසිය ගානක් ගෙවල් ගිනි තියලා තියෙනවා. මෙතුමන්ලා මේවාට නායකත්වය දුන්නා. පේරාදෙණියේ පීඨාධිපතිට මරණ තර්ජන.
කථානායකතුමනි, දමිතා මෙයාගේ වේදිකාවට ගියාම මෙයා අරගලකරුවන් වෙනුවෙන් පෙනී සිටින්න හදනවා.
(විපක්ෂ නායක සජිත් ප්‍රේමදාස සහ ආණ්ඩු පක්ෂ ප්‍රධාන සංවිධායක ප්‍රසන්න රණතුංග අතර උණුසුම් වාද විවාද සිදුවේ. ඒ අතර විපක්ෂ නායකවරයා කථානායකවරයාගෙන් කතා කිරීමට වේලාව ඉල්ලයි.)
කථානායකවරයා – ඔබතුමා විනාඩි 10 ක්ම ගත්ත නේ. කරදර කරන්න එපා. ඔබතුමා වගකීමෙන් යුක්තව කටයුතු කරන්න.
විපක්ෂ නායක සජිත් ප්‍රේමදාස – නවක වදයට අපි විරුද්ධයි. නවක වදයට විරුද්ධව පියවර ගන්න. අපි ඒකට විරුද්ධයි. මම කියන්නේ ත්‍රස්තවාදී පනත අනිසි ලෙස පාවිච්චි කරලා නිකරුණේ ඉන්න මිනිසුන්ව ගන්න එපා හිර භාරයට. ඒකයි මම කියන්නේ. අපි ත්‍රස්තවාදයට විරුද්ධයි.
