වසර ගණනාවක් තිස්සේ පළාත් සභා අක්‍රියව පැවැතීමෙන් පළාත් සභා යටතේ පවතින පාසල්වල අධ්‍යාපනයටද අර්බුද රැසක් එල්ල වී ඇතැයි සමගි ජන බලවේගයේ කොළඹ දිස්ත්‍රික් මන්ත්‍රි මුජිබර් රහුමාන් පැවසීය.
ජාතික පාසල් හැරුණු කොට සෙසු පාසල් පාලනය වන්නේ පළාත් සභාව හරහා බවත් පළාත් අධ්‍යාපන අමාත්‍යවරුන් නොමැතිව ආණ්ඩුකාරවරුන්ට පමණක් එම කාර්යය තනිව කරගන්නට නොහැකි වී තිබෙන බවත් මන්ත්‍රිවරයා සඳහන් කළේය.
පළාත් සභා පාසල්වල ගුරු හා සම්පත් හිඟය ආදී අර්බුද රැසක් මතුව තිබෙන බව කී මුජිබර් රහුමාන් පළාත් පාසල් ගොඩනැඟීම සඳහා ජනතා නියෝජනයක් අනිවාර්යයෙන් අවශ්‍යව තිබෙන බවත් එම නිසා පළාත් සභා මැතිවරණ පවත්වන්නේ කවදාද යන්නත් ප්‍රශ්න කළේය.
