රටේ ආදායම වැඩි කර ගැනීමට බදු ව්‍යුහය වෙනස් කළ යුතු බවත් රජයක් ලෙස වියදම් කරන විට එය ඉලක්ක ගත විය යුතු බවත් එම ඉලක්ක සම්පුර්ණ කළ යුතු බවත් විපක්ෂ නායකවරයා කියා සිටියේ ය.
කුමන ආණ්ඩුවක් පැවතියත් පීඩනයක් අසහනයක් ඇති වුවත් එය අවම කිරීම රජයේ වගකීම වුවත් මේ රජය තුළ සමාජ ආරක්ෂන වැඩපිළිවෙළක් නොමැති බවත් ඔවුන් ළඟ ඇත්තේ රාජපක්ෂ පවුල රැකගෙන මැති ඇමතිවරු සංවර්ධනය කිරීමේ ආරක්ෂණ වැඩපිළිවෙළක් බවත් මේ වන විට රාජය ඇමතිවරු 38ක් සිටින බවත් තවත් පුද්ගලයන් කිහිප දෙනකු පත් කිරීමට නියමිත බවත් විපක්ෂ නායක සජිත් ප්‍රේමදාස පෙන්වා දුන්නේය.
රට බංකොලොත් කළ නාමල් රාජපක්ෂ නියෝජනය කරන ජාතික සභාවට රට දියුණු කිරීමට රටේ ප්‍රතිපත්ති ප්‍රමුඛතා නිර්මාණය කිරීමට අවශ්‍ය කෙටිකාලීන මධ්‍යකාලීන සහ දිගුකාලීන සැලසුම් සකස් කිරීමට බාර දී ඇති බවත් එය හාස්‍යයට කරුණක් බවත් රට විනාශ කළ රාජපක්ෂලාගෙන්ම විසදුම් ලබා ගැනීමට සිදුව ඇති බවත් පැවසූ විපක්ෂ නායකවරයා කියා සිටියේ ඔවුන් ජනතාව අන්දවමින් කටයුතු කරන බවයි.
මෙවැනි දේශපාලන මගඩිවල කොටස්කරුවන් වීමට සමගි ජන බලවේගය හෝ සමගි ජන බල සන්ධානය සුදානම් නොමැති බවත් විපක්ෂ නායකවරයා කියා සිටියේ ය.
විපක්ෂ නායක සජිත් ප්‍රේමදාස මේ බව පැවසුවේ ඊයේ (08) පැවති සමගි ජන බලවේගයේ යටිනුවර ආසන බලමණ්ඩල රැස්වීම අමතමිනි.
