රටට මේ වන විට ඇති ඇමැතිකම් 15 හා රාජ්‍ය ඇමැතිකම් 15 හොඳටම ප්‍රමාණවත් බව විපක්‍ෂ නායක සමඟි ජන බලවේගයේ නායක සජිත් ප්‍රේමදාස කුලියාපිටිය නගරශාලාවේදී පැවැති ආසන බලමණ්ඩල රැස්වීම අමතමින් පැවසීය.
පෙරේදා (12) පැවැති මෙම බලමණ්ඩල රැස්වීමේදී හෙතෙම පැවැසුවේ සුරපුරයක් කිරීමට පැමිණි අය අද රට හොරපුරයක් බවට පත් කර ඇති බවයි. දරුවන් පන්ති කාමරවල ක්ලාන්තයෙන් ඇද වැටෙන විට සිය දහස් ගණනක් තරුණ තරුණියන් අපේක්ෂා භංගත්වයෙන් රට හැර යන විට, කර්මාන්ත ශාලා වැසෙන කොට හෘද සාක්ෂියට එකඟව අපිට ඇමැතිකම් ගන්න පුළුවන්දැයිද කීවේය.
මේ රටේ ඇමැතිකම් 15ක් හා රාජ්‍ය ඇමැති කම් 15ක් හොඳට ඇති. නමුත් පොහොට්ටුවේ 134ක් එකතුවෙලා මේ ජනාධිපතිවරයාව පත්කරගත් නිසා ඒක මේ රජයට කරන්නට බැහැ. ඒ අය ඒ වෙලාවෙ ඡන්දය දුන්නෙ වරදාන වරප්‍රසාද ගන්න. එයාලට රට ගැන හැඟීමක් නැහැ. හොඳට තිබ්බ රටක් ප්‍රජාතන්ත්‍රවාදී ඉතිහාසය තුළ මෑතකාලයේ බංකොලොත් කරලා දැම්මා. කිසිම විදිහකින් ලක්‍ෂ දෙසියවිස්සක ජනතාව පාවා දීලා වළපල්ලට ඇද දැමූ රට හොරාකාපු හොර කල්ලිය එක්ක ගිවිසුම් ගහලා කිසිම විදිහකින් ආණ්ඩු කරන්න සමඟි ජන සන්ධානය සූදානම් නැහැ යැයි පැවසීය.
