මැණික් අපනයනය සඳහා මාර්ගගත ක්‍රමයක් නැති කමින් මැණික් ව්‍යාපාරිකයන් මෙන්ම පතල් කර්මාන්තයේ නියැලෙන අයට දැඩි අසීරුතාවකට මුහුණ දීමට සිදුව ඇතැයි විපක්ෂ නායක සජිත් ප්‍රේමදාස පාර්ලිමේන්තුවේදී අද (23) පැවසීය.
විපක්ෂනායකවරයා මෙසේ පැවසුවේ ස්ථාවර නියෝග 27(2) යටතේ ප්‍රශ්නයක් යොමු කරමිනි.
මැණික් කර්මාන්තය මෙරට ආර්ථිකයට ඉතා සුවිශේෂි දායකත්වයක් ලබා දෙන ක්ෂේත්‍රයකි. පසුගිය 2021 වසරේ මෙරට මැණික්, දියමන්ති හා ස්වර්ණාභරණ අපනයනය මගින් ඩොලර් මිලියන 276ක ආදායමක් උපයා ඇත.
සෘජු අපනයනයට අමතරව කොවිඩ් වසංගතයත් සමගම සංචාරකයින්ගේ පැමිණීමේ අඩුව මැණික් කර්මාන්තයට ද දැඩි ලෙස බලපා තිබේ. බොහෝ රටවල් මැණික් අපනයනය සඳහා මාර්ගගත ක්‍රමය යොදා ගත්ත ද මෙරට ඒ සඳහා පවතින්නේ ඉතා අඩු පහසුකම්ය. මේ නිසා මැණික් අපනයනය කරනු ලබන ව්‍යාපාරිකයින් පමණක් නොව, පතල් කර්මාන්තයේ නියැලෙන්නන්ට ද මුහුණ දීමට සිදුව ඇත්තේ දැඩි අසීරුතාවයකටය.
ඒ අනුව, මෙය ජාතික වැදගත්කමකින් යුතු ගැටලුවක් වශයෙන් සලකා පහත සඳහන් ප්‍රශ්න වලට නිශ්චිත පිළිතුරු හා පැහැදිලි කිරීම් රජයෙන් බලාපොරොත්තු වෙමි.
1.රාජ්‍ය අනුග්‍රහයක් නොමැතිව මෙරට මැණික් ප්‍රතිඅපනයනය සිදු කෙරෙන බව රජය දන්නේ ද? මැණික් කර්මාන්තය පවත්වා ගෙන යාම සඳහා මැණික් ප්‍රතිඅපනයනය වර්ධනය කළ යුුතු බව රජය පිළිගන්නේ ද? එසේනම්, ඒ සඳහා මේ වනවිට රජය ගෙන ඇති ක්‍රියාමාර්ග කවරේ ද?
2.පරීක්ෂණාගාර පහසුකම් වැඩිදියුණු කිරීම සඳහා මැණික් අපනයනකරුවන්ගෙන් ලද මුදල් මගින් අරමුදලක් ඇති කරන ලැබූ බවට තොරතුරු වාර්තා වේ. එවැනි අරමුදලක් මැණික් හා ස්වර්ණාභරණ අධිකාරිය සතුවේ ද? එසේනම්, ඒ කොපමණ මුදලක් ද? එමගින් සිදු කරන ලද කටයුතු මොනවා ද?
3.රත්නපුර ප්‍රදේශයේ ඉදි කෙරුණු මැණික් කුළුන සඳහා භාණ්ඩාගාරයෙන් මුදල් වෙන් කිරීමක් සිදු කළේද? ඒ කොපමණ ද? මේ සඳහා මැණික් හා ස්වර්ණාභරණ අධිකාරිය මගින් ප්‍රතිපාදන වෙන් කිරීමක් සිදු කර නොමැති ද? මෙම ගොඩනැගිල්ලේ පවතින කඩ කාමර බාහිර පාර්ශවයන් ට ලබා දීමේ දී අනුගමනය කරනු ලබන ක්‍රමවේදය කුමක් ද?
4.පසුගිය කාලයේ දී මැණික් හා ස්වර්ණාභරණ අධිකාරියේ ප්‍රධාන කාර්යාලය නව ගොඩනැගිල්ලක් වෙත යොමු කර ඇති බවට තොරතුරු වාර්තා වේ. මෙහි සත්‍යතාවය කුමක් ද? නව ගොඩනැගිල්ලක් සඳහා යොමු වීමේ දී එය ප්‍රසම්පාදන කමිටුවේ අනුමැතියකට යටත්ව සිදු නොකළේ ද? එසේනම්, ඒ සම්බන්ධයෙන් අභ්‍යන්තර විගණනයක් සිදු කිරීමට රජය කටයුතු කරන්නේ ද? නොඑසේනම්, ඒ මන්ද?
5.මැණික් කැපීම, මැණික් ඔප දැමීම පිළිබඳව නව පරපුර පුහුණු කිරීම සම්බන්ධයෙන් රජයේ අවධානය යොමු කර තිබේ ද? එසේනම්, ඒ සඳහා විධිමත් පාඨමාලාවන් පැවැත්වීම රජයේ මැදිහත් වීමෙන් සිදු කරනු ලබන්නේ ද? ඒ සඳහා පුහුණුවලත් නිළධාරීන් මැණික් හා ස්වර්ණාභරණ අධිකාරිය සතුවේ ද?
